Kamprapport

Tysdagens flomlyskamp på Ålgårds nye, flotte storstove opna med ein stor sjanse til kvart av laga. Kristian Magnusson kom åleine med Gramos Gashi i Ålgård-målet etter to minutt, men sistnevnde hindra scoring. I andre enden lurde Kristofer Atli Bjarnason ei tvilsom offsidefelle og kom åleine mot Kristian Monsen. ÅFK-angriparen lobba over målvakta, men ballen dabba på tverrliggeren to gonger!
Ola Selliken var tilbake etter skade sist, og storspelte på kanten mot Ålgård II. Etter 17 minutt vart han sett opp av Svein Arne Monsen, skar inn frå venstrekanten og sende gjestene i føringa.
Rosseland låg kompakt og utnytta heimelagets upresise pasningsspel. Ti minutt før pause fekk Svein Arne Monsen ballen i gåve frå vertane, men avslutninga frå 14-15 meter gjekk rett på keeper Gashi.
Fem minutt etter pause fekk Monsen sin revansj. Eit tilsynelatane svakt frispark såg ut til å gå heilt inn til Gashi, men den notoriske målscoraren frå Lyefjell dukka med eit opp føre nasen på Ålgård-keeperen og pirka inn 0-2.
Rosseland skapte mykje, og fjorårets brynejuniorar Ola Selliken og Anders Hognestad var gode på venstresida. Selliken opna Ålgård-forsvaret ved fleire høve, men Rosseland makta ikkje å utnytte overtaket og omgjere dei mange sjansane i fleire scoringar.
I staden reduserte heimelaget. På lagets andre sjanse i kampen heada Mikal Klungtvedt inn 1-2 i det 91. minuttet. Dei siste overtidsminutta vart hektiske, men Rosseland heldt hovuda kalde og kunne bokføra ein svært fortent og godt gjennomført bortesiger.