Kamprapport

Rosseland reiste til Husabø med berre ein innbyttar, laget var forberedt på forsvarskamp mot EIK sitt andrelag. Oransjetrøyene låg bakpå og hadde ganske god defensiv kontroll på topplaget. Etter 17 minutt baud sjansen seg framover då eit kjapt innkast frå Jan Rune Hoff fant Paul Ove Laland. Han slo inn på første berøring. Føre mål venta Are Gabriel Høyland, som vende vekk forsvararen og knalla ballen i mål. 0-1!
Etter scoringa handla det meste om å forsvara seg og Kristian Monsen varta opp med fleire god redningar bakerst hjå RBK. Mot spelets gang fekk Høyland ein sjanse til å dobla leiinga før pause, chippen gjekk over keeper men og over målet til EIK. I staden utlikna heimelaget etter ei fin opprulling på høgrekanten. Paul Ove Laland blokkerte eit knallhardt innlegg, men var uheldig og styrde ballen i eige nett. 1-1 til pause.
Heimelaget forsette presset etter pause, Rosseland sleit med å skapa sjansar. Det var difor ikkje ufortent då EIK II tok leiinga ved nykomaren Mads Nørby Madsen på ei heading.
Heldigvis for Rosseland slapp heimelaget seg noko nedpå då dei hadde teke leiinga, gjestene fekk låna ballen meir og kom høgare på banen.
Ti minutt før slutt kom og utlikninga på vakkert vis. Innbyttar Kristian Wickstrøm slo eit flott innlegg til Svein Arne Monsen som på utsøkt vis banka ballen i mål på heil volley.
Begge lag hadde sjansar til å avgjere til sin fordel mot slutten, men kampen enda 2-2. Det resultatet har truleg Rosseland (og opprykksjagande Nærbø, Eiger og Riska) mest grunn til å vera nøgde med.
Rosseland har blitt eit vanskeleg lag å slå etter sommarpausen og står no med tre uavgjorte og ein siger på fire tette kamper etter ferien.