Kamprapport

Rosseland gjekk ut i hundre mot gjestene frå Gjesdal. Spydspissane Ola Mæland og Albert Braut Tjåland stressa Ålgård-forsvaret og etter ti minutt måtte svarttrøyene gje til corner.
Kristen Reime laga rom for kaptein Peter Aarrestad Time som stanga heimelaget i front.
Same mann dobla leiinga ni minutt seinare. Jarle Madland sin knallharde volley vart redda, men Peter Time var nådelaus på returen – 2-0 før 20 minutt var spelt!

Rosseland fortsette hardkøyret og å fortsette å skapa sjansar, etterkvart tok kreftene slutt og tempoet ned. Ålgård hadde meir ball mot slutten av omgangen og kom og til eit par fine sjanser. Reduseringa to minutt før pause kom litt ut av ingenting. Eit godt skot frå distanse lurte seg inn bak Steffen Bolme i RBK-målet.

Heimelaget heva seg etter pause. Åtte minutt ut i omgangen kom kampens flottaste angrep og avslutning. Olav Aske og Kristen Reime kombinerte langs høgrekanten og sistnevnte avslutta utagbart bak Marius Halvorsen. Det viktige 3-1-målet var både fortjent og viktig for kontroll på poenga.
Ålgård ga aldri opp. Laget sende opp ekstra angriparar på slutten og fekk betalt i form av straffespark og redusering på overtid. 3-2 signert Arne Ravndal var både for lite og for seint. Dommaren bles av kampen minuttet seinare og Rosseland kunne feire tre nye poeng.

Sjølv om heimelaget mangla ei håndfull spelarar til skader, ferie og reiser, stod dei som spelte fram som eit mykje betre lag enn Ålgård. Noa Gjøse Oftedal gjekk rett inn og storspelte sentralt på midten saman med Sondre Hovland. Kristen Reime bidrog med skoring og assist så lenge kreftene heldt, Kasper Mæland hadde full kontroll på venstrebacken.

Peter Aarrestad Time var kaptein med stor K mot Ålgård og vart kåra til banens beste i sin 223. kamp for dei oransje. Time speler sin tiande sesong i oransje, midtstopparen skora sitt 56. og 57. A-lagsmål mot Ålgård.